中醫點睇肩周炎
中醫叫「漏肩風」「肩凝」,常見有三類:
風寒型
受涼或者吹冷氣後加重,得暖舒服啲,肩膊又凍又僵。
氣滯血瘀型
痛點固定、按落好痛,夜晚痛得特別厲害。
氣血虧虛型
年紀大或者體弱,肩膊痠軟無力,活動範圍慢慢收窄。
診所點幫你
醫師會先檢查肩膊邊個方向郁唔到、痛喺邊,再按類型配合:
- 董氏奇穴:喺手腳遠端取穴,落針後慢慢郁肩膊,睇吓活動範圍有冇改善
- 針灸、拔罐:放鬆肩頸肌肉,舒緩痛楚
- 推拿:逐步鬆解繃緊嘅組織,增加活動範圍
- 中藥:體虛或者反覆發作,配合內服調理
肩周炎通常要一段時間慢慢恢復,療程次數因人而異,醫師會同你傾清楚。
日常自己可以做
- 爬牆運動:手指沿住牆慢慢向上爬,每日幾次
- 鐘擺運動:身向前彎,手臂放鬆輕輕打圈
- 肩膊保暖,避免冷氣直吹
- 唔好因為痛就完全唔郁,越唔郁越黐
以下情況請先去醫院
- 跌親之後肩膊突然郁唔到(可能骨折或者脫臼)
- 肩膊又紅又腫又熱,或者伴發燒
- 手臂麻痺、無力
- 左肩或者手臂痛,伴心口翳、氣促、出冷汗——即刻去急症
懷恩堂中醫診所